اشحال ام الحزن زينب اوچلثم
عليها الليل من چلچل واظلم
اشحال الحرم واشحال اليتامه
ليل اهدعش من چلچل ظلامه
گامت تذكر احسين وعمامه
او عليها الهظم فوگ الحزن غيم
غدت للحرم بالصيوان حنه
هاي اتصيح يبني اوتجر ونه
اوذيچ اتصيح راحوا كل اهلنه
بعد ذاك الشمل هيهات يلتم
وليله اتصيح يوليدي يالاكبر
نايم عالثره او جسمك امطبر
عسن يوم اللفينه يوم الاگشر
ولا هل علخلگ شهر المحرم
اورمله اتصيح يوليدي يا جاسم
ابدال العرس عالتربان نايم
اگعد عاين الحال الفواطم
گبعت بالمذله اولبست الهم
الرباب اتصيح يبني اونور عيناي
ورم صدري اودرتلك ثداياي
يعبد الله انگطع برباك رجواي
اوعگب عينك عليّه النوم يحرم
گامت زينب اتلم النساوين
او تتفگد غدت بطفال الحسين
فگدت فاطمه اوصاحت غدت وين
اخاف الخيل داستها يچلثم
تدورها اطلعت والريج يابس
شافت من بعد عالخيم حارس
صاحت ماشفت طفله يفارس
غدت من بيّنه اولا بيها نعلم
صاح اعلى المعاره اخطفت هالحين
اولاحتلي سواده يم الحسين
لچن منها اسمعت يا زينب اونين
كسر گلبي اوركن حيلي تهدم
للحومه اعتنت زينب ابهمه
تون وتصيح وين انتي يعمه
لگتها لايذه ابكتر ابو اليمه
تون اعليه اووياه اتكلم
تگله من گطع راسك ابسيفه
اومن هشم اعظامك واخذ حيفه
يبويه الجيش سلبنه اعلى كيفه
اومتني ابسوط عدوانك تورم
يبويه امست اعليه المسيه
اوبعيده اخيامنه صارت عليه
يبو السجاد گلي اشلون بيه
بعد ياهو الهلي ابردتي ايتوزم
صاحت زينب ابعبرات وونين
يبعد اهلي لفيتچ لاتخافين
گامت فاطمه من جسم الحسين
شبگتها او دمعها انحدر واسجم
تگلها اشجابچ لهاي المعاره
اوبگينه اعليج مدمعنه ايتجاره
تگلها الخيل لمن لفت غاره
خفت منها اوهمت من المخيم
صاحت يبو اليمه ابدمع جاري
بناتك زيدن عگبك مراري
يخويه المن اسكت يو اباري
اوتدري اشجم طفل عگبك تيتم
بيها اعتنت زينب للصواوين
اوغدت حنه عليها امن النساوين
ماغمضت لعد ذيچ الحرم عين
لمن ريح الفجر بالكون نسم
اترك تعليق