ليلة عاشر ابشهر المحرم
تلاگو للموادع بالمخيم
مسوا هاشم ابليلة مواعيد
اوتسمع بالخيم لصواتهم ويد
حيوها بالتلاوه اوبالتهاجيد
اولا منهم جفن للنوم سلم
غدت لوداعهم بالخيم لمه
هذا يشبگ الهذا ويشمه
اويحن الولد ويلوع اعلى امه
اوعلى ابنيها تلوع اوتنحب الام
تشب اگلوبها اوتلتهب نيران
اوعبرات الدموع اتسيل وديان
تلوع اعلى الحرم گامت الشبان
اوعليها الحرم تجري ادموعها دم
هوت ليله اعلى الاكبر لاچن اتنوح
وهي اتودعه وداع البدن للروح
تگله شلون عني اتغيب وتروح
اوتدري الجسم عگب الروح يعدم
ربيتك اوعيني الطولك اترب
اولعند ايام عرسك يبني احسب
عليه الدهر ماظنيت يحرب
وانصبلك ابدال الفرح ماتم
تعال اوشوف رمله اشكثر ونها
حين انگطع من جسام ظنها
ياهو ايلومها لوداع ابنها
لو ذاب الگلب منها اوتولم
تگله والدمع بالعين سجام
عمرك مابلغ يبني اثنعش عام
افگدك وآنه اظل عگبك يجسام
عسن لاگالها الله يامشيم
ربيتك اوليلي اسهرت برباك
اشلون اصبر يبعد اهلي اعلى فرگاك
عسن سيف اليصيبك صابني اوياك
واظل اسحن صبر فرگاك والهم
هوت ويلي الرباب اعلى عبد الله
تودعه والدمع عالخد تهله
گبل ماتنفطم يبني تگله
يفطمك حرمله ابسهم المحتم
يشمامه اليرد الروح طيبك
ينجم اسهيل يامسرع مغيبك
ريت السهم يرليدي اليصيبك
يصوب رگبتي اورگبتك تسلم
تعنه احسين لخته اوطب عليها
يبرها اعلى فگده اويسليها
بطل حيلي لمن سمعت وليها
تغير لونها وتراكم الهم
يگلها عايني الهاي الروايه
اعلى چتلي اعتنت يازينب اعنايه
بعد ما بينه اوبين المنايا
سواد الليل هذا اونصبح اخذم
باچر تحمل اعلينه الكتايب
اوتشب مابينه نار الحرايب
واخوتچ تمسي عالغبره ضرايب
اويحاتفني اعله عبد الله المحتم
وابو فاضل على الشاطي ايتطبر
اوجاسم بالمعاره ابصف الاكبر
اوگومي اوخوتي واولاد جعفر
من عدهم فلا ديار يسلم
اوتشوفين السهم مارد چبدتي
اوفوقگ الگاع يسفح دم رگبتي
وعليچن تهجم العدوان يختي
اونار الگوم تسعر بالمخي
يزينب هلة هله بهالاطفال
عگب عيناي انتي الهاذي العيال
يوم اهدعش حادي الظعن لوشال
غيرچ ما ابها العيله ايتوزم
من سمعت وصيت احسين طاحت
اومن عدها يويلي الروح راحت
گامت هالوجه تلطم اوصاحت
عسن وياك ياخذني المحتم
يخويه اشلون اشوفنك رميه
طريح اويكت دمك عالوطيه
يبو السجاد گلي اشلون بيه
اشيصبرني اعلى فگدك يامشيم
يخويه وابتلي ابهاي الجريره
واظل يحسين من عگبك ابحيره
يخويه ابها الحرم چيف البصيره
چم طفله اوطفل منها ايتيتم
تحاچي الليل زينب غدت بعويل
اوعبرات الدمع وديان وتسيل
عسنك لا طلعلك فجر ياليل
اونهارك مثل ليلك يصبح اظلم
يليل افراگهم هون للوداع
فجرك لايطر اويطلع ابساع
تره العيله ابصباحك تصبح اضياع
اويتشتت شملها الچان ملتم
اترك تعليق