في جور بني أمية
شتگول يا صاحب الفكره والرّويه
فعلة بني العبّاس أعظم لوأميّه
فعلة بني اميّه ابتداها يوم صفِّين
دارت رحاها وطحنَت اعيان المسلمين
وطلعت خوارج دين واغتالت ابوحسين
وظل ابن ابوسفيان يلعب بالرّعيّه
سب وشتم فوگ المنابر صبَح سنه
وكل الضّغاين والبلا اتولّدت منّه
تغزي سمومه وللهضايم غدت رنّه
وارماح ترفع روس تتودّى هديّه
وراحوا عداوه يدفنون ارجال حيّين
وذبحوا وسجنوا وين لمروّه نساوين
واطفال ذبحوهم بلا مطلب ولا دين
باليمَن والنّسوه بنظرهم خارجيّه
وباعوا النّساء المسلمات ابوسط لَسواگ
يا يوم كشف السّاگ عند املاحظ السّاگ
عدّة مذابح قاست الشّيعه بلعراگ
وزياد وابن ارطاة ما بگوا بگيّه
وتالي على سم الحسن كلها اتّعازى
وآل الطّليق اتحزّبوا ساعة جهازه
ومروان تدري ابْچَم سهم صاب الجنازه
وگلبه ايتلظّى امْن لَضغان الداخليّه
وكل الرّزايا والمصايب يوم لطفوف
چم أرمله ظلّت سترها راح لچفوف
وكل حادث اليجري ابْدهرنا ايصير موصوف
ولا ينوصف خطبٍ جرى بالغاضريّه
هذا مصاب حسين لا تطلب تفاصيل
ما ينوصف حال الأسارى والمچاتيل
لو ضجّة الأيتام لو نوح المداليل
واجساد بالرّمضا وروس ابْسَمهريّه
واسأل الكعبه والمدينه بالّذي چان
من حيّة الرّقطا اللعينه آل سفيان
وعرّج على كهف المظالم آل مروان
تلگى مجازر كل صباح وكل مسيّه
توصف اطفال الذبّحوها بغير سايه
تذكر حراير باليسر ركبت عرايا
والسّوط لمتون الحرم مو للمطايا
وميدان مطروحه الجثث للأعوجيّه
السجّاد جم قاسى ومن بعده سليله
وابن الوزَغ يشفي ابإهانتهم غليله
ودس الهم اسمومه وگضوا بالسّم غيله
وزيد وشبل زيد اشعظمها من رزيه
هذي إشاره من فضايع آل سفيان
تلويح لٌرود المنابر نسل مروان
حط النّقاط اعْلَه الحروف اتزيد تبيان
اتشوف المصايب جايّه من گبل اميّه
في جور بني العبّاس
ياللي تعدّد باختصار افعال اميه
أذكر بني العبّاس واحكم بالقضيّه
هذي بنو العبّاس چانوا مطمئنين
كلهم يدٍ وحده وذراري الحسن وحسين
وملكوا الأمّه واصبحوا كلهم فراعين
وحطّوا النّبال اعْلَه السّلاله الفاطميّه
لو ردت تفهم وين باب الظّلم والجور
بس عگب السفّاح واتمايز المنصور
شوف اشْعمل بال الحسن وشْ هدم من دور
والما هدم من دورهم ظلّت خليّه
چم طالبي لاگى المنيّه في گيوده
واللي اهْدموا اعليه السّجن وهو ابسجوده
والهام ما هو مرتجي للبيت عوده
ويخاف ما ينتسب للزّهرا الزچيّه
واللي ابْفَخ اتعفّروا محد دفنهم
اسأل يخبرك واضح التّاريخ عنهم
خلّوا ملايكة السّما تبچي لَجلهم
ظلّوا ابْغَبرا او روس فوگ السّمهريّه
وچم شيّدوا بالعاصمه بغداد بنيان
بنيانها اتشيَّد على هامات وابدان
سادات كلها شيوخ وكهولٍ وشبان
واشْچَم هجوم اعْلَه البيوت الفاطميّه
باب الحوايج بالسّجن يسحب اگياده
وخوف المنايا والسّجن فرّت أولاده
وبالسّم جَرَع مثل الأبو كاس الشّهاده
والسّيف والسّم يشتغل صبح ومسيّه
وخلّوا الصّوايح والنّياحه ليل وانهار
وذيچ المنازل بس حرم واطفال لزغار
بالبرّ هاموا ما بگه بالدّار ديّار
ما جرت هذي بلَفعال الامويّه
لكن سبي النسوة يسارى ابكل لَمصار
وذيچ لَطفال الظّاميه لا جرى او لا صار
وخيام ممليّه حرم تنضرم بالنّار
والأصل كلّه امْن الاسباب الاوليّه
فعلة بني العبّاس ما اكثرها فجايع
أفنوا ذراري المصطفى والعدد ضايع
وآل الطّليق افعالهم كلها شنايع
سبي النّسا وذبح لَطفال ابلا جنيّه
رض لَجساد اعْلَه الثّرى وتكسير لَسنان
ووگفَة مصونات الرّساله بوسط ديوان
وايزيد من سكر الخمر والنّصر نشوان
هذي ثمرها شجرة الخبث الرّديّه
اترك تعليق