يوم اهدعش من شهر المحرم
لفوا بالهزل لحدود المخيم
صاح اباب المخيم الحادي
يالله الرچب يودايع الهادي
طلعت زينب اوگامت تنادي
ابعدوا او بالرچب احنه انتوزم
اشلون الغرب هاي يرچبونه
اوجدنه المصطفى اوحيدر ابونه
ابعدوا اوبعد لا تتگربونه
عليكم گرب هاي لحرم يحرم
لفت زينب لعد ذيچ المهازيل
ترچب گامت اطفال او مطافيل
لمن فرغت تعنت يم العليل
صاحت گوم ارچبك يامشيم
گاللها واهو يلگف بالانفاس
اركبي انتي اوخلني اويه هالناس
دارت عينها اوصاحت يعباس
حادي اظعونه اعلى السفر عزم
يخويه انت امن اهلنه اتچفلتني
اوخذت منك بخت من ركبتني
ليش ابديرة الغربه عفتني
ابولية زجر واعليّه ايتحكم
ماني اختك يراعي العلم والجود
خذت منك بخت والبخت مريود
عذرتك من شفت ماعندك ازنود
يخويه اوبالعمد راسك تهشم
حده الحادي اومشت نوگ اليساره
اوزينب نادته ابعبره اتجاره
يحادي الهزل مرنه اعلى المعاره
نريد انودع اهلنه ابدمع من دم
مر حادي الهزل عالجثث بيها
اوگامن كلمن اتودع وليها
رمله اعلى الوجه تلطم بديها
اوليله اتصيح يوليدي المشيم
غدت زينب تنادي ابدمع جاري
يبو السجاد ودعتك الباري
يخويه چتفوا ايميني اويساري
اوبزنودي الحبل يحسين وسم
مشينه اعلى الهزل ومچتفينه
اوخذونه ابها اليسر صبن علينه
اوياكم نظل لو يحصل بدينه
لمن يحسين يلفينه المحتم
مشت نوگ الظعن والحرم تنحب
اوعليها اسياط شمر اوزجر تلعب
حته الظعن للكوفه تگرب
لبن ازياد المبشر تجدم
طلع روس اهلها ابروس الارماح
اووراها الناس طلعت والهم صياح
راس احسين لمن للحرم لاح
غدت عالروس وعلى الوجه تلطم
زينب نادته والدمع همال
عنه اشغيبك واخفاك يهلال
فك عينه اعلى زينب والدمع سال
اوبآيات الصبر گام ايتكلم
اترك تعليق