شهادة الأكبر

الاكبر لاح ظهر الغوج وارزم

اوعليه احسين دمعه انحدر واسجم

سدّر للحرب والعطش بي مض

او هز غدارته او عالخيل عرض

صل ارمول بلسانه ايتلمض

من يدنا او منه يگطر السم

تچنه ابوالده او عالخيل ذبها

او يمنه الحرب عاليسره گلبها

چسب نوماسها اوضيع دربها

اولف راياتها او للسرب حطم

عگب ما بالطفوف ابده الفراسه

او راواهم حرب حيدر اوباسه

العبدي غافله اوصابه اعلى راسه

او تغيب نور وجهه بحمر الدم

كثر ويد المسامي او غدت دوجه

عليه او بالخيم صارت اللوجه

دم راسه جره اعلى اعيون غوجه

طفح مذعور وعلى الخيل درعم

اعلى سرجه انحنه اوگام الغوج يصهل

ايتخيّله الحريب ايريد يحمل

گصد للگوم وعليه دارت الكل

لمن جسمه ابمواضيها تخذم

وگف بالكون والعسكر عليه غار

مثل دور الجفن عالعين بي دار

غد واجسمه ابمواضي البيض طشار

ضرايب عالرمل ما بعد يلتم

هوه اعلى الگاع لاچن من وگع صاح

اولعد احسين نگلت صوته الارياح

ثلث مرات گام او علوجه طاح

اخذ روحه او بي بي النفس تم

نده يحسين ليّه اسرع تراني

طحت بالكون والعسكر ولاني

يبويه امن العذب جدي سگاني

عليّه لا يظل گلبك امولم

تعناله او على ابنيه تخوصر

او صاح ابصوت منه الضخر ينطر

على الدنيه العفه بعدك يالاكبر

عگب عيناك ريت الكون امولم

يگله ياضوه اعيوني يمصباح

يحاوي كل سجايه الخمسه الاشباح

يبويه من طحت مني الگلب طاح

او طود الصبر لفراگك تهدم

يبويه من وصل ليك او تدناك

او خضّب وجهك الشعاع بدماك

يبويه ريت روحي اتروح وياك

او لا شوفك خضيب الوجه بالدم

يبويه اشلون اشوفنك ابها الحال

اموزع بالمراهف فوگ الارمال

يبويه العذر شنهو عند العيال

ليها من آخذك وانته امخذم

شالوله الهواشم للصواوين

وهو يمشي او على ابنه شابح العين

طلعت زينب او باجي النساوين

تخمش اخدودها او عالوجه تلطم

هوت فوگه تحب خده او تشمه

او غدت تصبغ شعرها ابفيض دمه

عسه ابعيد البله اتگله يعمه

على التربان نايم يلمشيم