زينب ياعلي زينب الخيل من اوصلت حدها
ليك اتوجهت تتنخـاك وتحشــمــك يوالـدها
زينب ياعلي زينب .. من گوّضـت ولياها
طلعت والمهر عاري .. ياحيدو تلگّـاها
صاحت طاح اخوي .. احسين صاح المهر وياها
يزينب طاح ابو اليمه
يزينب ســابـح ابدمه
يزينب خل نصل يمه
وناخذ ماي ويانه .. چبدته العطش ماردها
زينب للمهر گالت .. وهيّه على الهظم جمضه
يمهر حسين اروح وياك .. اخاف احسين مايرضه
ومنطلع خيالي ايصير .. لعيون الزلم عرضه
اخــوي حسين مايقبل
وخافـن يالمهر يــزعـل
لاچن اوچب على التل
وانده وين أخوي حسين .. بلچن يسمع الندها
گال المهر يازينب .. اضنّچ ما بگالچ راي
ابن امچ وگع ويصيح .. أريدن يالهوادم ماي
دجيبي الماي يازينب .. وانه الآخـذچ وياي
ويشرب والـــد سكينه
ومن يشرب يفك عينه
ونجعده ويحـــــاچينه
وبمعصبچ يازينب .. اجروح التكلف انشدها
زينب للمهـر گالت .. يمكدر مرّدت چبـدي
تگول حسين يطلب ماي .. وانه الماي مو عندي
يمهر حسين وحدك روح .. خبره وآنه اضل وحدي
يمهر حسين أضل اتناك
انچــان اتــريـدني وياك
اريد اتريض بمـمــشـاك
يمكدر حيل مابيّه .. المثلي الله يساعدها
مشت وي المهر زينب .. يهد الحيل ممشاها
تبچي والمهر يبچي .. يبو الحمله اعلى مبچاها
دلّاها اعلى خوها حسين .. شگول اشلون دلاها
حـرمـه ولفـت واليها
عدها هموم تشچيها
تحاچيه ما يحاچيها
لاچن قسمت اعلى حسين .. بمها وعودها وجدها
يخويه ابجاه جدي اعليك .. وجاه امك تحاچيني
يخويه من عگب عيناك .. لهلـي من يوديني
يخويه اگعد وباصرني .. واعلى الــراي دليني
يخـويه عيالنا هجّت
يخويه طفالنا سجّت
يخويه خيامنا وجّت
يخويه اگعد وطفي النار .. وخيول العده ردها
فك عينه ابوجه زينب .. شگول اشلون فك عينه
شاف النار وي الخيل .. بمــوسّـط صواوينه
وتهيج صاحب الغيره .. على هضمت نساوينه
مــا چــــــانت علــى باله
حــي وتنـــــولي اعيــاله
اعلى ابو السجاد هالحاله
امض من العطش والحر .. وامر من الجتل وادها
التفت لخته يحاچيها .. يزينب گالها اشجابچ
يختي العيلتچ ردّي .. تتيه الحرم بغيابچ
ردّت لاچن أشردّت .. على بن امها الجنَه شابچ
والله الفخر الها وبس
بيها حيل تتنـفس
تتجلّد وتتحمس
تشوف اطفال مذعوره .. وتشوف الخيل تطردها
زينب ردت من حسين .. تعال وشوفها بيا حال
تكفكف بيد دمعتها .. وبـيد امــوســره الــدلال
الف عفرن على زينب .. وعفيه الها جدم ينشال
حرمـه غدر بيها البين
اوفكرها انشده بين اثنين
مابين الحرم وحسين
شتدبّ اوشتعبّر .. وهي حرمه وحرم عدها
لخوها راحــت وردّت .. وبخيمها تشب النار
رادت من يطفي النار .. شـافت ما حصل نغّار
صاحت لچن مغتاضه .. اضخر لا يحامي الجار
شنهي من صبر صــبرك
علي يا والدي اشبصـرك
يبويه بهــاي ما عـــذرك
بناتك صارت ابشده .. ونت حاضر شدايدها
علي يا والدي منته .. الحمه ويوم الشدد مندوب
يبويه الصبر فصّلته .. ثوب وركد هذا الثوب
يبويه حسين أخوي اچتل .. وعزّي البالطنب منهوب
وهاي الحرم شيلمها
اوشبـت نـار بخيمها
وراح اللــي تــزمــها
يبويه الليل لو هوّد .. ياهو الي يهودها
اترك تعليق