زينب تعتب وتنده .. يمن بالبخت جبتوني
چاوين البخت وشلون .. بين اجناب عفتوني
بين اجناب عفتوني .. اعتب والعتب شيفيد
وهاي النوگ چابوها .. هزل والطريج ابعيد
صحت يوم اگبل الحادي .. يحادي النوگ وين تريد
مابك رحم يالجمّال
اشلون امشي اعله هذا الحال
عندي اطفال عندي عيال
وانه مكلّفه بيهم .. اخوتي بهاي وصوني
وصوني وعافوني .. خواني وعلاني الذل
وشوف الحرم فوك النوگ .. ترجف والدموع اتهل
حگها الفاجده الوليان .. من الاجنبي تجفل
ويه الغرب تمشي شلون
بهاي الناس شيگولون
علي خاف اخوتي يعتبون
اگلهم غصب راح امشي .. بهاي اخوتي يعذروني
بهاي اخوتي يعذروني .. عنهم ماشيه گوه
ويضل فوك الثره مطروح .. وين البيه المروه
وانه اصرخ يبو فاضل .. يامن خوتك خوه
يخويه انطيت حگ السيف
تبگه بلا دفن ياحيف
ويصبح خدر زينب طيف
ومن عگبك يبو فاضل .. عدوانك يباروني
عدوانك يباروني .. بطريج الماعرف وصفه
ولا واحد من الوليان .. دخّن عالحرم چتفه
ردت بدر الهواشم حي .. وشوفن رايته بچفه
وصوّت يالولي حياك
يخويه الحرم يترجاك
جبتها من المدينه وياك
تعال وشوف حالتها .. وحط چفك على متوني
يجيني برايته وسيفه .. ويلتم الشمل هيهات
وينشف دمعة اعيوني .. چفيلي مردم الكلفات
أچفوفه ورايته وجوده .. ضلن فوك المسنات
وخوي حسين عالغبره
عاري وهشموا صدره
وخوته وصحبته بكتره
وانه اعله الهزل زينب .. عساهم لا يشوفوني
انه على الهزل زينب .. وخوتي على الثره نومه
بين الگطعوا چفوفه .. وبين السلبوا اهدومه
حادي النوگ ما انصف .. مر بينه على الحومه
وشفت الجثث بعيوني
شفتهن ونخطف لوني
صحت ياناس خلوني
اضل يم اخوتي والگوم .. عيّوا ما يخلوني
لن حادي النياگ يصيح .. يالبالخدر معروفه
ما واحد خيالچ چان .. يبت المرتضى يشوفه
شتگولين يخت حسين راح انروح للكوفه
ايام الخدر راحت
وزينب سمعته وصاحت
عتبه وللعدو لاحت
ومن عگب الخدر يردون .. للكوفه يمشوني
صدگ عگب الخدر لني .. ذليله مهبطه للراس
وطوف ابّلدت الكوفه .. وتتفرج عليّه الناس
لن الوادم ايگولون .. هاي اخت البطل عباس
آيا هضمت الهضمه
عگب الخدر والحشمه
عليه الناس ملتمه
وينشدوني على الوليان .. واسكت من ينشدوني
راح الخدر والوليان .. راحن يالعلي وذليت
بعد والمجلس بن ازياد .. اروح بهاي ماظنيت
حگي يابني هاشم .. اعتب عالعدل والميت
انه مخدره تدرون
اذل بهل الشيم ترضون
لون عن حالتي تنشدون
يهل الشرف والغيره .. بالديوان تلكوني
اترك تعليق