انده وارد اوجه انداي .. يم المرتضى حيدر
وحچيله اعله هظم الطف .. يسمع هالحچي يگدر
اريد احجي على هظم الطف .. واريد المرتضى يسمع
وگله عگب عين حسين .. العسكر عالفواطم دع
ولن بيــن الـزلــم والخيل .. زينب يــاعلي تطلع
تصيــح وتصفــج الجفين
يهل الله الـطــريــج منين
اريد اوصل لخوي حسين
واخد معصبي بيدي .. واگلّه راحت الخدر
اگلّه راحت الخدر .. لخويه وانتظر شيگول
واگلّه جيتك وخليتك .. على خيامك الخيل تجول
يگوم انشا الله وياي .. اخوي انچان مو مچتول
يحيــدر هــاي حــالتها
غريبه وفاجده اخوتها
تعال وشــوف مشيتها
تگوم وتوگع وتنده .. احضر ياعلي احضر
احضر ياعــلــي تــنــده .. ولا هــاشمي اليسمعها
اعله خوها تنشد العدوان .. زحمه الخـدر يمنعها
تالــي توجهت للتــل .. وجــمــر الهظــم يـدفعها
مشت زينب على كل حال
ولو ما چــانــت اعله البال
صــاحــت هــاي ما تنشال
كلفه طلعتي كلفه .. يبويه بين هالعسكر
مشت زينب تريد التل .. ولعيون العده بانت
عليها گلوبهم لانت .. وعليهــا هــاي ماهانت
زينب واجفه اعله التل .. هاي ابّال من چـانت
فــوگ التل تگـع وتــگــوم
وعلى مصرع وليها اتحوم
ول ول يازمــان الــشــوم
هاي ام الخدر والعز .. بالوديان تتعثر
يحيدر زينب على التل .. شدة حيلها او وگفت
الخيمها تلتفت نوبــه .. ولخــوهــا نوب تتلفت
تصد للخيم تلهب نار .. وبحسين العــده حفت
تعال وشوف بيها اشصار
تــصــد للخـيــم تلهب نار
تــصــد لعيالهــا طــشــار
وتصد لحسين راح حسين .. من هاي اشبعد شكثر
زينب بگت محتــاره .. لخــوها تــروح شيردها
ولو راحت لخوها تخــاف .. عن الحرم ينشدها
زينب بين اخوها حسين .. وعياله الدهر شدها
لاتــكــدر تــصــل لحسيـن
ومتدري الحرم هجت وين
ضـلــت بس تــديــر العين
مذهوله تشوف النار .. بخيام الحرم تسعر
زينب صاحت ابحرگه .. وغدت تعتب على ابن امها
تكله مخدراتــك هاي .. شــبوا نــار بخيمـها
يخوي اطفالها الهجت .. يبو السجاد شيلمها
واختك ركد منها الحيل
وتتــلــفــت ابين الخيل
والي اتريد گـبــل الليـل
يلم الخدر ويجمع .. اطفال التايهه بالبر
بجت وتصيح وين حسين .. اخوي انچانك حي گوم
على بختك يبو السجاد .. يبن امي ولتنه الگوم
ناداها بضعيف الصوت .. يختي الامر ليچ اليوم
اعيالي توزمي بيها
والاطفال احفظيها
يزينب عينچ عليها
يختي ومن عگب عيني .. عينچ عالحرم تسهر
ومن چلچل عليها .. الليــل زينب جمعت العيله
وسكنه اگـعــدت يم رمله .. وام چلثوم يم ليله
اعله زينب ليلة المرت .. شكول اشمرت اشليله
تون زينب ومهضومه
گامت گصدت الحومه
صاحت يخوتي نومه
وعدكم حرم سهرانه .. وعليها العده تفتر
اترك تعليق