تمنّيت حيدر حاضر اليوم
ويشوف ابخيمنه حايطه الگوم
عطاشه اوعلينه الماي ملزوم
او عبّاس نايم طابله النوم
والنوم يدري يثر اللوم
زنده انگطع والراس مجسوم
او يمّه علي الاكبر او جسّوم
مچاتيل مسلوبين الهدوم
حيدر يبويه امن الگبر گوم
تره ابنك احسين اليوم مهموم
اتحضر وحدته لحّد يجيدوم
تجي الكربله لازم اوملزوم
يمندوب عنّ احسين شلهاك
مني حشيم الطف تعنّاك
اخذ معصبي وللنجف ماجاك
اولا گال اِلك زينب ابرجواك
يبويه المثل هليوم ردناك
وحسين يابو احسين ينخاك
عله وحدته هذي تمنّاك
تجينه ابسريه اوناشر الواك
اوحمزه الهجوم اومالك اوياك
وخوي الحسن مدرع ابيمناك
وأبو جاسم محمّد ابيسراك
اوتگلوله يحسين عيناك
افرح يبو السجّاد اجيناك
بالمعركه تنخه سمعناك
نجلي همومك من حضرناك
نسوّي الذي ما صار بعداك
عـجل يناعي احسين وارشد
لوادي النجف للگبر تگصد
صيح الهظم يا حيدر اگعد
گوم احتزم يالگوة الضد
يـالجندلت مرحب وابن ود
وبكربله شنو الجره انشد
جيش العده اويه ابنك وگف حد
حصل ثارهم شلّاعة الود
محمّد بعد دونه يگف سد
حشيم اليسر ما جاك عاني
اولا گال اِلك شنهو الدهاني
ياوالدي ابشدّه تراني
اولا شالك الغيض اعله شاني
عله امصيبتي احمدني عفاني
يوم أُخوتي بالطف عماني
والهظم چاس المر سگاني
يمندوي و الهيّج أحداني
يوم اگبلت للشام اجاني
جمهورها اطبول اومغاني
والمجلس الطَيّر اذهاني
من طبّته گلبي لواني
والعدو بالنشده ابتداني
وآنه امخدّره او يگصر الساني
واعيون شمّاتي تراني
هذا يبو الحمله شجاني
اترك تعليق