زينب تناديك يَـصْبَـي عيني
حسين يبن أمي اقعد اوحاچيني
يا بدر سعدي الغَرَب عنّي اوراح
اوياصْبَي عيني الهوى اوعالأرض طاح
ليل واظلم عقبك اعليّه الصباح
اوصار حايل بينك اوما بيني
حال بيني وبينك او لا بَعْدَ اشوف
يا مراري اوضيعتي ابوادي الطفوف
سَلَب وِفْراق اومذلّه اوعِدَه اوخوف
اوبعد دهري اشرايد يراويني
احسين خويه، احسين خويه، يا حسين
آنا زينب وين عنّي رحت وين
ان چان فارق بيني اوبينك البين
انسبت يا والي إلهَلي ايودّيني
حسين يبن أمي الما خاب النخاك
ماني اختك خايفه اولذت ابحماك
اوبالثدي الطاهر الغذّاني اوياك
لا تصد عن نَخْوِتي اوتجفيني
يبن أبويه احسين يالـمالَك مثال
تظن منك ينقطع ظنّي محال
شلون اصدّگ تظل نايم عالرمال
اوحايِره ابطف كربلا اتخلّيني
احسين يا غوث الصريخ الـيعتنيك
اشلون كل هذا العتب ما يمضي بيك
ماني اختك يَـبن ابويه اوجيت ليك
بيك احشّم والهضم عاليني
جيت احشّم بيك واعتب واعتذِر
حاسِره اوفرّيت ليك امن الخدر
ردتك ابحالي اومصابي تختبر
بلچي عندك راي إلي اوتهديني
اتحشّم اوتنخى اوتچثّر بالاعتاب
اوترِد تصغي اوتنتظر رد الجواب
خايِفَه نادِته ابلوعه اوظنها خاب
ترضه يحسين العده توليني
مشت للحومه اوگلبها من الِهْموم
امصدّع اومِن خوفها اتطيح اوتگوم
او لا اوحيّد من هَلِي يِحصَل اليوم
يبن ابوي ابجسمك ايدلّيني
صدَّت ابدهشه اولِگت ذيچ الِجْسوم
اوشافِتَه مِثل البدر بين النجوم
امخضّب ابدمّه اوصاحت يَمظلوم
ريت عميَه او لا تشوفك عيني
اشلون اشوفك بالسيوف امخذّميك
او لا كتر من جرح سالم ظال بيك
جسمك ابهالحال وآنا اعتب عليك
وارتجيك امن العده اتحاميني
العذر لله او ليك من هذا العتب
وادري تعذر لو قلِت لك بالسلب
سلّبونا اخلافك اوعزنا انَّـهَب
وآنا خدري ابشيمتك تدريني
راح أرِد للخِيَم لاچن يا خِيَم ؟
احرگوها اوخدري ابنار انضرم
هايِمه فرّت أطفالك والحرم
وْ مِن أرِد ليها العده تسبيني
راح أرِد واعتذر منّك يالچفيل
ولو خِلّه وما يطاوعني الدليل
شلون بالنسوان لو چلچل الليل
بيها مِن يتوزّم او يِكفيني
راح أرد اوردّتي لوعه وعذاب
اشحالها الوِليانها فوق التراب
اشلون بُم چلثوم وسْكينه اورباب
عيون عبره اعلى الدرب تربيني
راح أرد يحسين لا ماراح أرِد
ابغير موتي اوياك ما يشفي الچبِد
آه لو يحصل لَعِد جسمك لِحد
اوياك چان ابلحدك اتواريني
اترك تعليق