رثاء الإمام الهادي

رحيله من المدينة إلى بغداد

امْن ارض المدينه سافر الهادي بلبنين
ومحّد بگى امْن اولاد حيدر بالحجازين

سافر بَهل بيته وبگت طيبه خليّه
ودّع گبر جدّه وعبراته جريّه
وبن هرثمه يگلّه يبن خير البريه
عجّل يگلّه اتوخّر النا بعد يومين

راح الگبر جدّه مثل ما راح جدّه
اتمرّغ على گبره وصب الدّمع عنده
إيگلّه يجدّي ما بعد هالسّفر رَدّه
ماشي بهل بيتي يَجدّي والنّساوين

أصبح ونادى بالرّحيل امْن المدينه
ودّع گبور الأهل والزّهرا الحزينه
وصاحت النّاس اوداعة الله يا ولينا
هاي اليتامى والأرامل تلتجي وين

بالدّرب چم برهان سوّى وشافت النّاس
ذل العدا وخلّى الموالي رافع الرّاس
أشجار وانهار اسأل اللّي رجع للكاس
وابْكل وكت يبدي المعاجز والبراهين

بغداد طب وخاليه ظلّت ربوعه
وفزعت أهاليها النظر وجهه سريعه
ولَرْض المدينه ابعيلته اتعذّر رجوعه
وسافر الْسامرّا ونزلها عمدة الدّين

بس ما نزلها شيعته عنّه امنعوها
وجاروا عليه ومهجته ابسم گطّعوها
حتّى گضا وملّة الهادي ضيّعوها
بديار غربه وعزوته كلهم بعيدين

وابنه محمَّد في بلد گاضي نحيبه
ومن بعدهم ظلّت ابوحشه ابْلاد طيبه
ومحّد بگى بيها من العتره النّجيبه
وبديارهم يا حيف ينعب طاير البين

اجتمعت عليه بس ما نزل بيها اهمومه
دايم حزين وجرّعه الطّاغي سمومه
واعْلَه الطّهر صار اعظم الايام يومه
جهّز أبوه وغسّله بمدامع العين

وفاته وتجهيزه ودفنه

بنت الجواد اصبحت مفجوعه وحزينه
تنظر الهادي يلوج فاجعها ونينه

تگلّه يهادي يا شبه جدّك الهادي
لا تجذب الونّه ترى ذايب افّادي
فتِّح اعيونك نغّصت شربي وزادي
وسهرت عيني والعدو گرّت اعيونه

بديار غربه يالولي اتگضّت ايّامك
واتموت ما واحد حضر لك من اعمامك
جاير علينا يا دهر دايم علامك
من دون كل الخلگ جرمه ما جنينا

سمّ البگلبك يا عزيزي فت گلبي
بعدك يوالينا عسى ما شوف دربي
ما ينگضي نوحي على امْصابك ونحبي
تگضي بغربه وموحشه تبگى المدينه

غمّض عيونه ومات بديارٍ غريبه
والحسن هاجت حسرته وعالي نحيبه
وسجّاه بالحجره وطلع مشگوگ جيبه
وتجري ادموعه ويصفج اشماله بيمينه

وبيده الطّاهر غسّله والگلب صادي
وبالچفن لفّه وبالنّعش خلّوا الهادي
وضجّت اعياله بالچجا وصاح لمنادي
يَلغرب گوموا شيّعوا اجنازة ولينا

شيلوا الهادي يالغرب ما عنده احباب
امْبعّد عن اهله وعن الشّيعه ابّلدة اجناب
شبل الحسن تجري ادموعه والگلب ذاب
اينادي مصابك كرّر الوحشه علينا

للگبر جابه ونزّله والدّمع هامي
وحبّه وصاح وداعة الله بگلب دامي
وين الذي يوصّل بني هاشم عمامي
يخبرهم بفعل العدا والدّهر بينا

والله يَبويه موحشه الدّنيا عليّه
بديار غربه اتجرع احتوف المنيّه
بلِّغ سلامي المصطفى خير البريّه
وگلّه ترى احنا بالهضم بعدك بگينا