صورة الشاعر
اسم الشاعر : السيد عبدالحسين الشرع

راحته وضعف بدنه

عگب ما كثر العسكر اصياحه

او ما ظل بيت ما حط بيه نياحه

وگف ياخذ لعد الروح راحه

اوچبده امن العطش بورح اوفحم

گام ايعالج ابروحه اومهجته

نزف دمه اوثگل سيفه ابيمنته

لن الحجر متلولح بغرته

دفگ دمه او شيبه اتخضب بالدم

شال الثوب يمسح دم جبينه

وشابح للخيم والحرب عينه

اثاري اعداه چبده امعينينه

رموه ابسهم لاچن ناجع ابسم

شبچ سهم المثلث فوگ چبده

اخذ نصه ولعد ظهره تعده

يشلعه اشلون ظل محتار مده

انحنه اعلى السرج واگبل للمخيم

صاح ابصوت يا زينب تعالي

بهضني الجرح هذا او شده بالي

طلعت زينب اوصاحت يوالي

عسانه انموت كلنه او انت تسلم

دگلي يا جرح يحسين اشده

واشوف اجروح جسمك ملها عده

اومه الزينب ابچفه اعلى چبده

لنها اتشوف منه ايفوّر الدم

تگله اشلون اشد جرحك والمه

وامن صدرك ونحرك بگت ذمه

بينه اشلون عگبك يبو اليمه

چم طفله اوطفل راح ايتيتم

ليه امن الخيم طلعت اعياله

شافنه اوغدن يبچن الحاله

حن گلبه اوتلهف على اطفاله

او عليهم دمع عينه انحدر واسجم

عليه وحده غدت تجذب الونه

اوحده اتصيح ودينه الوطنه

او وحده اتصيح وين اتروح عنه

او تخلينه العدو اعلينه ايتحكم

بچه اوناده يزينب سكتيهن

تراهن گطعن گلبي ابحچيهن

عگب عيناي عين الله عليهن

ترعاهن اومني اعليهن ارحم

سدر للحرب تشخب اجروحه

او زينب بالخيم ظلت تنوحه

ثگل وعلى المنيه اشرفت روحه

هوه اعلى الگاع من ظهر المطهم

اترك تعليق

avatar
  Subscribe  
نبّهني عن