حال ابن الحنفية بعد فراق الحسين

اصبح محمّد ناصب الماتم على احسين

يصفق اِبراحاته اُو منّه تذرف العين

اِمن النُّوح بطّل قال ما بطِّل مناحي

واَعمي اِعيوني اِمن البكى واصفق لراحى

واَنصب مآتم في مسائي وفي صباحي

معذور لو أنتلف من حزني على احسين

معذور لو أنا أصب الدمع سكّاب

والجيب أشقّه اُوفوق راسي أحثي اِتراب

متفطّرة كبدي ترى اِمن افراق لحباب

واَعظم على قلبي اِفراقي اِسنادي احسين

اِمن اَهلي ثمنتعشر بدر غابوا بساعه

والقمر هاللي تزهو الدنيا اِبشعاعه

راعي الحميّة والرّياسة والشجاعه

اُوحاوي الكرم والفخر واِخصال الحميدين

كُلهم اِبليلٍ دامسٍ ساقوا الضعينه

اُوعافوا جواري اُو صحبتي اُوعافوا المدينه

يا ليتني في الضعن أمشي عنْ يمينه

واَصير منهم وألزم اِركابات لحسين

ألزم اِركابه حين يركب للمطيّه

واَخدم عضيدي في صباحي والعشيّه

واَصير منهم من اِذباح الغاضريّه

وافوز معهم بالشهادة عندِ لحسين

واَفوز مَعْهم بالشهادة يومُ لطرادْ

مثل البطل عبّاس والأكبر ولمجادْ

واِتصير معهم جثّتي من فوق لوهادْ

فوق الثرى من غير تغسيلٍ اُو تكفين

واِتدوس صدري مثلهُم خيل الدعيّه

اُوينشال راسي مثلهُم بالسمهريّه

والشمس تصهر جثّتي اشوى عليّه

أهون علَيْ من أسمع النّاعي على اِحسين

ويلاه ما ليّه قبر في ذيك لقبور

ويلاه ما ليَّه صدر بالخيل مكسور

اُويلاه مانا من ضحايا يوم عاشور

ويلي على اِخواني اُوا حزني على اِحسين