تحت أمرك ياحسين

إتقدّم أبو فاضل اُونادى اِبصوت يحسينْ

آمر علينا كُلّنا الأمرك مُطيعينْ

آمر علينا كُلّنا في طوع آمرك

أعمارنا فدوة يبو سكنة لعُمرك

واِحنا الذخيرة اِمن الوصي ليّام نصرك

باتشوفنا يوماً نثور اِعلى المُضلّينْ

إنْ خضتْ بحراً يا لولي خضناه ويّاك

واِجبال إنْ تصعد صعدنا أرواحنا اِفداك

في الدهر عِيشتنا مَهي حلوة بليّاك

إنته حمانا والرّجا يابن الميامينْ

واِتقدّمت اُولاد حيدر من حواليه

هذا يحبْ إيده اُو هذا يحبْ رجليه

اُو هذا يترجّى العلم منه اليوم ينطيه

اُو نشرَوا ذوايبهم على الأكتاف في الحينْ

واِتلامعت بانوارها اُوجوه العشيره

واِحسين مولاهم مثل شمسِ المنيره

إسم الله على ذيك لوجوه المستنيره

الله اُولحّد تبقى على الغبرة مَطاعينْ

واِتقدّم العرّيس والأكبر ابجنبَه

اُوطاحوا على المولى السّبط كُلٌّ يحبّه

من شافهم شيخ العشيرة زاد نحْبه

اُوهلّت اِدموعه واَصفق اليسرى بليمينْ

واِتذكّر المظلوم ما يجري عليهم

في يوم عاشر والذي اِيفعلون بيهم

يومٌ تجول الخيل في العركة عليهم

يبقوا ثلاثتيّام في الغبرة مطاعينْ

اُوهلّت اِدموع السبط لمَّن شاف لولادْ

واِتجدِّدتْ له زفرته محروق لفّادْ

عنده الخبر لنهُم يظلّوا فوق لوهادْ

يا عين هلّي الدمع لفراقِ الميامينْ