المولد الشريف

صلاة الله على الهادي * وعلى اللي الحور خدمتها
البتوله فاطمه الفطمت * من النّيران شيعتها

البتوله فاطمه الشعّت * ابْشعّة نورها الجنّه
ابتفّاحة خلد مكنون * بيها الرّوح يتعنّى
قدّمها لبو إبراهيم * شع بيده وفزَع منّه
يگلّه شلون تفّاحه * وتشع خبّر ابقصّتها

يگلّه هاي تفّاحه * من الجبّار مذخوره
گبل ما يخلق الاكوان * بيها النّور من نوره
نور الطّاهره الزّهرا * البالتّقديس مشهوره
شاء الله تجي الدّنيا * ومن الجنّات طينتها

إكلها انت وخديجه اوْياك * رب العرش هذا امره
تتكوّن يَنور الله * منها البضعة الزّهرا
وحملت وازهر المنزل * ولَنها بالحشا تقرا
وخبّرها النّبي الهادي * وما تنوصف فرحتها

فرحت والنّسا لازم * ابْزود الفضل تجفيها
تحسدها على المنحه * المنحها خالقي بيها
حتى بالوضع لَيْكون * نجسه او كافره اتجيها
اتلامسها حرم نجسات * مَيْناسب طهارتها

إجت حوّا وإجت ساره * ومريم وآسيه يمها
عن اليمنه او عن اليسره * ووحده ابصدرها اتلمها
ووحده واجفه بالطّيب * وتسكّر خديجه أمها
وضعت فاطمه او بالحال * إجت مريم وشمّتها

تشمها او گالت اخذيها * تراهي طاهره ام اطهار
طهور او لا تشوف دموم * بس من ضربة المسمار
بين الباب والحايط * وضعها ويل گلبي صار
خرّت والضّلع مكسور * واعْله العين لطمتها