عفه يم الحزن گلبچ .. يتحمل دواهي السود
چدچ وامج وعودچ .. واليوم الحسن مفگود
اول هم فگد چدچ .. العلى فگده كثر همچ
وثاني صواب يوم الباب .. ذاك الكسر ضلع امچ
ودم عودچ البالمحراب .. اجره من الجفن دمچ
وجاچ اصواب اخوج اليوم
الحسن يخت الحسن مضلوم
گضه لاچن گضه مسموم
حگ من يصرخ الناعي .. ويصوت نشف بحر الجود
عفه گلبچ على بن امچ .. يزينب من وصلتيله
وشفتي الطشت جدامه .. ومن السم ركد حيله
ومن شافج نده يحسين .. ياخويه الطشت شيله
شيل الطشت من يمي
الطشت بي چبدتي ودمي
لا ترتاع بت امي
وهذا الطشت جدامي .. تشوفه بس دمه وچبود
وزينب للطشت صدت .. وشافت چبدت ابن امها
ولنها مگطعه وچبود .. جدامه ويبس دمها
صاحت عگب ذاك الضيم .. الي هاي الدهر ضمها
يهل الرحم خلوني
اون ولا تلوموني
شفت الحسن بعيوني
وشفت الطشت جدامه .. ويجلب چبدته بالعود
صاحت يالحسن نارك .. صدگ ماتنطفي نارك
تخلي اختك يبعد اختك .. متحيره بخطارك
باچر من تجي الوفاد .. وتشوبش على دارك
من يطلع يحييها
وعلى المعتاد يطيها
ترضه اطلع واحاچيها
واصيح بصوت يالوفاد .. راعي الدار ما موجود
راعي الدار ماموجود .. اگول ومن يصدجها
يبن امي البحر جودك .. عين الضيف متجها
ترضه من ارد اگله مات .. وخل يلطم على وجها
وخل ينصب اباب الدار
عزيه ويجمع الخطار
ويصرخ والدموع اعبار
مات الحسن يالوفاد .. مثل ماجيت رد اردود
اترك تعليق