اجت زينب اوذبّت المعصب
جدّام اخوها والدمع صب
يبن والدي جيتك ابمطلب
عطاشه او نريد الماي نشرب
رجف شاربه من هاي وغضب
شد او ركب ورزم او حورب
او تچنّه شبل جسّام مرحب
لگه المشرعه من اصفوف وسرب
طوّه اخيولها بالسيف وطـرب
والزلـم فـوگ الـزلـم تـركـب
كراديـس ماتـنـدل الـمـهرب
نصه المشرعه او للماي من طب
حـرّم عـليـه الـماي يـشـرب
ذكر گلب اخوه احسين امعطّب
مله الراويـه و للخيـم غـرّب
او سگه الظاميه السيف المجرّب
لوله الذي امگدّر امـن الـرب
مـن يـگدر الـعباس يـگـرب
حدّر و شمّر اردانه عله الجيد
ابن والدي العنده الحرب عيد
وأرض كربله ارجت امن الويد
تچنّه و لكدها اعله المجاعيد
طواها او گلبها اعله المراصيد
ذب النوبني او جندل الحيد
او خلّه جثثها تارسـه الـبيـد
او يدّب عله كل عسكر ايزيد
لاچـن الـباري شاء ويـريـد
يره احسين بالطف مفرد اوحيد
يبن والدي منّي اشعذرك
وانته الذي دگّيت صدرك
ياذخر أُبوي اليوم فخرك
ياريت عمري دون عمرك
ويـن اليـشـيلـون التكالـيف
وين أُخوتي العدها الحرب كيف
أهل الرمگ والرمح والسيف
يبن والدي العباس المخيف
علينه احتوت خيل او مراديف
كوفه مـهي غـدّارة الضـيف
دعونه ظمايه ابحرّة الصيف
تطلب ابعتبه و تطلب ابحيف
جمع الشمل ذاك المِضه طيف
عباس شال العلم بيده
واعتله الترهب مهاديده
جر صارمه ابهمّه شديده
الهامات طرها بالحديده
جيش احتوه من كل بديده
نكّس ابطاله او صناديده
يطرد او من يلحگ طريده
يتناوشه امن السرج بيده
يصك بيه الآخر والبعيده
رمحه يفر ليه او يصيده
نعم الأخو الواسه عضيده
أخوي اعله المگدّر اشبيده
جره الكونّة الباري اويريده
انه أبوي نعم الخلف خلّف
عباس ذب الجهد وانصف
بالنفس وانه احسين بالطف
هزّ الرمح والعلم رفرف
مثل مرجلة حيدر تِوصّف
توزّم اوشال الصف عله الصف
لمّن طار منّه الزند والچف
تچنّه اونخه احسين من طاح
او چلّت اعليه اسيوف وارماح
سمع نخوته اوليه معتني راح
لگه امسلّب امن اهدوم وسلاح
يبن والدي ظهري انكسر صاح
فرح شامتي هليوم وارتاح
وآنه انكساري بالوجه لاح
شتفيد آهي اوصفگة الراح
الرايه أبو فاضل نشرها
دنّه اخيالته اولاح بظهرها
تچنّه اوعله الظلمه شمرها
ابتسم واعتنه شبچت سمرها
اوبالصارم الهامات طرها
اوكل جيمة الكوفه كسرها
كراديس ما تندل مفرها
والحرم طلعت من خدرها
تنخّة اوهلاهلها الذخرها
اجت والها والدمع سچّاب
تهيل اوتحث بچفوفها اتراب
يبن والدي والله الگلب ذاب
يا گصوزه المعرس بالأشياب
ومرادها فرهود الأطناب
وحسين لا ناصر ولا ذاب
دگعد يبو فاضل الينهاب
اِلي امناشده ويّاك وعتاب
يمنوّخ الهودج عله الباب
او سبعة عشر يبرون اِله احساب
اشوف الرِجه اوذاك الامل خاب
ويّه الغرب لو سِرَت ينعاب
يعمّي العطش لحشاي چوّه
اوعله الماي شلّاعة الثوّه
نهض من رُبه ابثّدي المروّه
معط صارمه اوخضّه اوتلوه
او عُود الجِنَه هزّه او تطوّه
اولاح بظهر مهره او تنوّه
اونصه العلگمي اوزلزل سوّه
مردها اونزل بالسيف گوّه
أبو فاضل او للجود روّه
غرف ماي لاچن ما تروّه
بچه اوردته حسبة الخوّه
جابته او حالت بس اهوّه
مثل خوّته لا تظن خوّه
دگعد يبو فاضل اوشوف
يسور العلينه الچان معكوف
يمبيّت ابگلب العدو خوف
مهي الخيل اجت لمّات وصفوف
او عله امتونها امجرّده اسيوف
النهبو اخيمنه اوعيني اتشوف
واِنته العله اختك چنت ملهوف
واِنته الذي بالكون ماصوف
شلفايده ما عندك اچفوف
اترك تعليق