العقيلة تشتكي في الشام

يحسين أنه زينب الحرّه

يظلّي الوگع بيمن أتذرّه

يا طبّة الشامات مرّه

اليزيد اوحصل بيده اليسرّه

ابسوطه عَلَه راسك تجرّه

حتّه الصديج اِلكم تبرّه

عَلَي طبتي للشام كلفه

اطبّه اوگبل ما چنت اعرفه

ونذالها بينه مچنفه

عدو والعدو ما بيه معفه

والمجلس ايحور اليوصفه

السبع و السبع لو طب يخلفه

او يزيد العدو ماخذ الوسفه

من هاشم اليوث المخوفه

وين اليدخن على چتفه

ابن والدي المگطوع چفّه

راسك يخويه ابّين اِديه

بالعود شفته منحني اعليه

يحسين چتلك يفتخر بيه

ينده اشيوخه اويلتفت ليه

منصف بدر هذا اليوافيه

اوغليل الگلب هذا اليطفّيه

گضه ثارنه العد علي الناسيه

ثار اليجادي ثار خلّيه

انتي الرباب الودّج احسين

يحب دار من بيها تحلّين

الراس هذا العندي امنين

اگلج وأنشدج ولو تدرين

تگلّه الحمانه الراس لحسين

تمنّيت لنّه ايشوفني وين

انه ابمجلسك وتشوف كل عين

ويشوفك تراني كون هالحين

ويشوف زينب والنساوين

عسه اوياه ياخذني عسه البين

وين اليصت الهلي أصواته

وأهل المراجل والثباته

رضت شيمة ابن أُمّي وذاته

للشام مسبيّه خواته

مشيهن غصب مدري من اذاته

او گرة اعيون أهل الشماته

كل منهم الحصلت مناته

اوعله محنتي گلبي اشگواته

أُميّه ابچتلكم كوّنت عيد

مطربه الزلم وتهلهل الغيد

نامت رغد واهل الوزه ابعيد

من هاشم البطحه الصناديد

هدران دم احسين وتهيد

اويطوفون بينه البلد والبيد

اوعليل التحمل جامعه اوگيد

من كربله للشام البعيد