هوه امن المهر والمهر جانه
امن المعركه يصهل لفانه
واِعله الأرض يسحب اعنانه
والخيل اجت وحده الخبانه
للسبي اتهيّن يا نسانه
من طاح والينه او حمانه
وبن والدي اليرهب جفانه
عله العلگمي نام اونسانه
راعي العهد يوفيه شانه
رضت شيمته ابولية اعدانه
هوه امن المهر والأرض ماجت
والگوم خيل اوزلم داجت
لخيامنه والحرم لاجت
عسه اختك لهاي الدار لاجت
النسوان من شافن الميمون
اِله مدمع ايهل امن العيون
يگلهن وليچن طاح بالكون
والگوم اجو للعز ينهبون
للبيوت وخيمچن يحرجون
صاحن يهلنه ما يگعدون
انه شايطه ونده ابصوتي
يسمعوني اويغضّون أُخوتي
يا ريت گبل احسين موتي
اولا شوف العده تنهب ابيوتي
انه شايطه ونده بالأصوات
يسمعوني اويغضون الآفات
أُخوتي الذي لگوّت الگلفات
أُسود ابّطن زور اومشبلات
عله اشبولهن بالرغم ينفات
نهب اوسلب للفاطميات
اوتشب نار والخدّر معولات
وشافه خذو منكم الوسفات
يحسين تنده من عله التل
يحسين والعسكر تعزّل
يحسين للفرهود هيّل
يحسين والقايد بالأوّل
يحسين يم الخيم حوّل
يحسين والنسوان تختل
يحسين تسمعني اتوجّل
يحسين لطباعك اشبدّل
يحسين أنه اختك هاي يحسين
يحسين شوفي يا ضوه العين
يحسين مدري مصرعك وين
يحسين اجتنه الگوم صوبين
يحسين للشر مستعدّين
يحسين وتسلب النساوين
يحسين وتوّج الصواوين
يحسين وأدري گلبك ايلين
يحسين للفزعه جريبين
يحسين للنغره بعيدين
من شافت الگوم اعتنتها
خيل اوزلم تتناخه اجتها
داجت عله الثايه او ولتها
هلهلت والرگبه لوتها
والعين بالمدمع أرختها
وصوات مهظومة تصتها
ندبت مسامي عشيرتها
من هاشم البطحه نختها
وأهل المدينة حشّمتها
بعيدين والعتبه جزتها
اجت شايطه المصرع أخوتها
وگفت عله التل عاتبتها
اوتثني عليها او ناشدتها
والأجساد منهم زلزلتها
تموج العتبها اوهظيمتها
من شافت الحاله اعذرتها
يخويه جيت كون أخبر جنابك
يخويه بالعده نهبو اطنابك
يخويه الگيت بالمنحر اصوابك
يخويه انشلّت ايده اشلون صابك
يخويه اومن سلب منّك اثيابك
يخويه ما خجل منّك اوهابك
يشمّامة الزهره المفدّه
يضنوة علي اومهجته او چبده
اوريحانة المختار جدّه
من شاهده اومن حضر عنده
اومن گلّب اصوابه المضهده
يگولون ماذيه البچبده
اوسمت الجرح ينشد ابشدّه
وحسين جرحه من يشدّه
ينازع ابحرّ الشمس وحده
محّد يغمضله اويوسده
عله الماي يوميلي ابيدّه
أناديك ما يشجيلك انداي
اولا تسمع اعتابي ونخواي
المن بعد يحسين شچواي
ظنّي انگطع وانگطع رجواي
شتهيّس احچيلي ابونّتك هاي
شنهو الذي ماذيك يحماي
يگلها الضهدني السهم بحشاي
اوسمت المصوّب ينسگه الماي
عله النوگ من يحدي الحدّاي
يخويه الشمر والله هظمني
ضربني عله امتوني وشتمني
لنكسر گلبه اولا رحمني
والهظم يبن أُمّي سگمني
يحسين يبن أمّي يفاعي
يالمحّد ابدمّك يداعي
اِلك بالسمه جبريل ناعي
بمعاتبي يحسين واعي
انه وداعتك تسمع اوداعي
أنشدك صدگ هيّن اضياعي
وين الذي الحالي يراعي
يحسين يبن أُمّي يمذبوح
عليك البچه والحزن والنوح
وصاويب جسمك بيه وجروح
اوللشام زينب عنّك اتروح
أروح او عليك الطرف مشبوح
والراس فوگ السمهري ايلوح
لون تنفده لفديك بالروح
ليكون اِلي يحسين راحه
لجيمن عله گبرك مناحه
مأتم فلا يبطل اصياحه
يحگلي لصبّ الدمع عبره
وجيم العزه دهري اعله گبره
مهو احسين شمّامة الزهره
مطروح متوسّد الغبره
يهل الناس گلبي اشكثر صبره
يردونه الكوفة الگشره
اويردونه للشام يسره
اجت والهه والعين تدمع
للمعركه اوشافت المصرع
مگصودها منّه تودّع
تگلّه يبو السجّاد تسمع
يردونه للشام نگطع
واحنه حرم وأطفال رضّع
عله بلوتي كل گلب يخشع
لونها ابجبل مرمر تصدّع
لونها ابنبي مرسل تجزّع
ولا صايحه بالصوت صاحت
عليك اوتجي الجسمك او طاحت
ولا نايحه يحسين ناحت
والنايحه للشام راحت
تره اعداك نامت واستراحت
يطلبون والعتبات لاحت
يهل الفخر يگروم يسباع
مچاتيل يا حلوين الاطباع
يكرام دمكم رايح اضياع
حاشه امن أُخوتي يگصر الباع
ابعيد البله النومه عله الگاع
ما هو محل النوم هسّاع
والشمر مانعنه امن الوداع
اشلون أبو سكنه رضه او طاع
ليكون اِلي يحسين چاره
نصبت المياتم بالمعاره
تاره ابنشد وأنعاك تاره
لا چن يبو سكنه يساره
يردونه الگصر الإماره
الشاماتها فوگ الكواره
وعيون كلّ الناس تاره
فرح شامتي اوهذي الدواره
وينام ابهنه ليله اونهاره
وأخوي افتكر منهو البداره
أخوي الفلا ينضام جاره
أُخوي اشكثر عنده جساره
الف ياحيف من ياخذ ابثاره
اترك تعليق