سكنه اتعنت لعمها المشيم
تگله امن العطش چبدي تولم
يبو فاضل يعمي انته بلوجود
اوبيدك مدهفك وبمتنك الجود
او عبد الله الطفل برويحته ايجود
اوچبده امن العطش بورح اوفحم
يعمي ماتشوف اشحال العيال
تلوج امن العطش وتلوع الاطفال
يعمي هاي ماچانت على البال
بوجودك علينه الماي يحرم
نهض لمن سمع مدلولة احسين
يبو فاضل تگله الوعد چاوين
يگلها يسكنه ماي تردين
لسويلچ بحرها اليوم من دم
يعمي الخيمتچ ردي يگلها
اوبشري اطفال اخوي احسين كلها
بعد ساعه واجيب الماي الها
او تچنه اگبالها اولاح المطهم
لگف جوده او لفه ايودع عضيده
طب الخيمته اوطاع اعلى ايده
يگله العلگمي يحسين اريده
اجيب الماي يوورود المحتم
يگله اشلون ارخصك يعباس
وانته هيبتي اوتاجي العلى الراس
يخويه انته المصجّر هذي الناس
وانته رايتي اوسور المخيم
يگله امن العطش لاجت اعيالك
واسمع بالخيم لوعت اطفالك
درخصني يمن روحي فدالك
صبر عندي بعد يحسين ماتم
تحسر ويل گلبي او صفگ بيده
او سالت دمعته او ودع عضيده
طلع مغضب يصيح الماي اريده
او هز غدارته او عالسرب گحم
اترك تعليق