عله شيعتي عيدي سلامي
يذكرون بمحرّم أيّامي
انه ابكربله مچتول ظامي
انه اوصحبتي والكل عمامي
كلهم مهاويل او مسامي
او سبي النسه اوتعول أيتامي
*****
عيدي الوصيه الشيعتي هاي
مياتم ينصبون العزاي
عله غربتي اومحنتي اوبلواي
لجلهم صبرت اعله الجره اوياي
يذكروني عد شربة الماي
حر او عطش ذوّبن لحشاي
*****
عذب ماي بارد من تشربون
العطش كربله اويومه تذكرون
غريب اچتلت يلي تحبّون
مصابي عليكم ما ظن ايهون
عله شانكم بلواي تدرون
ملابس حزن واجب تلبسون
مياتم عزه دايم تجيمون
ولزينب الحرّه تعزّون
انه ابكربله ظلّيت مرهون
ليالي ثلاثه موش مدفون
*****
جواب سكينه :
أعيدن سلامك عله اليهواك
عدهم خبر صبرك اوبلواك
عله شانهم هذا الجره اوياك
اليجيم العزاك اشلون ينساك
اليحبّك دهر يحسين ينعاك
يرجه الشفاعه والوفه اهناك
اترك تعليق