نزلو آل غالب والسفر تم
اوحط اوجاوروا بيت الله الاعظم
تم احسين متحيرابأمره
اوعليه الكتب ليل انهار تتره
حته اجتمع رايه اوصار فكره
يودي مسلم الليث المشيم
كتب مكتوب اله الخلص الشيعه
مسلم جايكم ياحذ البيعه
اليطيع امري لمر مسلم يطيعه
واليعصيه يخسر ويندم
اوصيكم اوطيعوني ابوصيتي
ثنية مسلم ابحيكم ثنيتي
بعثت الكم العمده امن اهل بيتي
اوچبير اولاد عمي اومنهم اعلم
نده مسلم اوگله اگصد الكوفه
اوكاتبني ابكل اللي تشوفه
امتثل لمره اوحب مسلم اچفوفه
اوجرت دمعة احسين اعليه اوكظم
اخذ ويا دليل اوسار ليهم
اوحيو بي اوگام يحيي بيهم
اهلال العيد چنه اوهل عليهم
اوچشف عنهم غيوم الحزن والهم
گاموا يعتنوا ويبايعونه
اوعن احسين واهله ايسايلونه
يمسلم دكتبلهم خل يجونه
صبر عدنه اعلى فرگه حسين ماتم
كتب مسلم اومنه الگلب ستر
يبو السجاد عجل لاتاخر
الك ميت الف سيف وبلچن اكثر
تحن حن الفصيل اعليك واعظم
الحسين يعزم على مغادرة مكة:
وصل مكتوب مسلم لبو اليمه
گراه اوشكر سعوان ابن عمه
نده عباس اخوه اوگرب يمه
گله اسره وللممشى تولم
روح ابساع شد اظعون العيال
حته انسير للكوفه اعلى كل حال
بدل حجته ابعمره اونوه اوشال
اوحل احرامه اوعالسفر عزم
كلمن سمع يتعجب اوينشد
ليش احسين يوم الترويه ايمد
لفه اممد يصيح اشسبب مبعد
يمن بيك المناسكوالفرض تم
ناداه اطلعت غصبن عليه
يخويه ظاعن امن اشرار اميه
اخافن يكتلوني ابها الثنيه
اوحرمه ماتظل للبيت الاعظم
يمحمد لفاني الحين جدي
وآمرني ابمسيري اوبذل جهدي
عهد منطي اوريد اوفي ابعهدي
يخويه والوفا اعلى الحر تحتم
ناداه ابدمع چالسيل ساجم
يخويه ابها الخطر ما دام عالم
ليش اوياك ماخذ هالفواطم
اخافنها لعداك تصير مغنم
يگله والدمع منه ايتحدر
عهد منطي يخويه ابعالم الذر
آنه انچتل واعيالي اتيسر
اوصدري ابخيل عدواني ايتهشم
جذب حسره اعلى خيه اوصفگ ايده
اوفك باعه اوغده يودع عضيده
يشم گلبه اويحب صدره اوريده
اورد للدار محني الظهر مغتم
اترك تعليق