الحسين يخرج من دار جدّه

من دار جدّه بوعلي حثّ الظعينه

شال اِبحريمه واِخوته من اَرض المدينَه

شبّان طلعوا امن المدينة بالسويّه

شالوا اُوخلّوا دُورهم تنعى خليّه

ما خلّفوا إلّا محمّد اِبن الحنفيّه

ما فنّه إلّا النوح واِمجاذب ونينَه

ما يبرح إلّا اِيقول شيلوني يغلمانْ

قوموا اطرحوني في الدّرب باسأل الرّكبانْ

باسأل عن اِخواني بقيّة آل عدنانْ

من شال عنّه بوعلي متْنام عينَه

باسأل عن اِخواني اُوقوم الْلي جفوني

من سافروا للغاضريّة ما اَذكروني

ما عوّدوني بالجفا ما عوّدوني

إتمنّيت أخويه تلتقي عيني اِبعينه

شبّان محلاهُم اُو رَكْبتهُم على الخيل

يومَ اطلعوا امن المدينة تالي اللّيل

اُوساروا بجمعهُم بين تكبيرٍ اُو تهليل

مثل الصقور اِتحوم من حول الظعينَه

ويلي لزينب تنتحبْ والدَّمع همّال

تبكي على ذِيك الحمولة اُوذيك لرجال

اِتمنّيت أرجع للمدينة مَعْ هلبطال

ما ظنّتي اِرجالي يعودون المدينَه

*ويلي على العبّاس يقدم ظعن لحسينْ

ويقول يا زينب يخيّه لا تخافينْ

تخسى الأعادي ما يقربون الصواوين

واُخوك عبّاس البطل ما ينكرونَه

قالت يخويه اليوم في اِحصونٍ مشيدَه

وأبطال من حولي اُو فرسانٍ عديدَه

بس خايفة أبقى مع النّسوة وحيدَه

واَرجع بليّا اِرجال يا خويه المدينه