من طيبه ببو اليمه الظعن زم
اوتوجه لعد مكه ابليل الاظلم
طلع خايف گبل ما يطر الاشفاگ
اوحده حادي الظعن وانوه اعلى الفراگ
لفه محمد اودمع العين دفاگ
يطيح اوينتهض والريح علگم
يصيح ابصوت لاچن دمعته اتهل
ريّض بالمجد يا حادي البل
يمكدر بالمفارگ لا تعجل
بعد هيهات هذا الشمل يلتم
سمع صوته الحسين اودار عينه
اوصاح ابرهد ياحادي الظعينه
ريّض لمن محمد يجينه
نودعه ونتباچه الهضم والهم
وصل ليهم يصيح ابصوت لاوين
ناوي ابهالظعن ياگرة العين
عايف حرم جدك ليش يحسين
اومنه بليل طالع واتكتم
گام ايجاوبه ويسچب العبره
يخويه الكتب گامت علي تتره
ولي بديرة الكوفه انصار كثره
اوليهم ضاعن ابها الليل الاظلم
ناداه اوجرت عبرة اعيونه
الكوفه انسيتها اشسوت ببونه
اوبيها اشصار من عگبه اعلى اخونه
چه تخفاك وانته ابحالها اعلم
لا تضعن ينور العين ليها
خوينه اولا يحن گلبك عليها
اگصد لعد مكه وجيم بيها
اوجاور ياعضيدي البيت الاعظم
اولو شفت الغدر لاح امن اهلها
اوصارت تشبه الكوفه ابفعلها
اگصد لليمن واسكن نزلها
واظنك بس تصل لليمن تسلم
اوبيها لو عليك الفلك يفتر
اوتشوف الناس عالمها ايتغير
عاد اطلع ابضعنك واضرب البر
لمن يحكم الباري اوبيكم ارحم
جمد رايه اووصاه ابوصيه
اريدك عين الي ابهاي الثنيه
اولا تخفي امن اخبارك عليه
اوتوادع ويه اخو وعليه سلم
صاح ارشد يحادي ابنيتك اوسير
اوحفت بالظعن ذيچ المشاهير
يخافون الهجن لو سارت اتنير
اويتروّع گلب زينب اوچلثم
ضياغم وتخسه ليوث العرينه
مثلهم تگدر اتحامي الظعينه
حته الطير هاشم صاجرينه
وهو ابچبد السمه ايخاف ايتجدم
الكل من عدهم المرهف نديمه
يظيم الموت سيفه اولا يظيمه
لون ما هالهوه ابحاجت نسيمه
ما والله اعلى ظعن الحرم نسم
انگطع ذاك الدرب وتحامته الناس
اوكلمنسمع رد امهبط الراس
من يخطف اوحادي الضعن عباس
اوزينب راچبه اوبيده المخذم
اشحدّ اللي يمر اويصد ليها
واخوها ابرايته ايظلل عليها
لمن وصل مكه الظعن بيها
حط اوجاورو بيت الله الاعظم
اترك تعليق