تعنه امن الخيم للعلگمي احسين
يصيح ابصوت يعضيدي اوگعت وين
بعد ما شوف دربي يا ضوه العين
يخويه الكون كله ابعيني اظلم
يخويه ابيا كتر طاحن ازنودك
يخويه العلم وينه اوين جودك
يبو فاضل زماني هم يعودك
او شملي اللي تشتت بيك يلتم
تخوصر يم عضيده او صاح اويلي
يشمس انهاري اويا بدر ليلي
يبوفاضل يخويه اگطعت حيلي
او طود الصبر من بعدك تهدم
يخويه ظهري الفگدك تحنّه
او عدوي اتشمت ابحالي اوتحنه
هوه چالرمح فوگه اوگام عنه
صفيحه اوحدها لفراگه تثلم
حنه ظهره عليه اوراد شيله
او بي يسدر لعد خيمة العيله
يگله لا يبن حامي دخيله
خلّيني ابمچاني يلمشيم
يگله شسبب يا نور عيناي
ما تهوه الخيمنه اتروح وياي
يگله واعدت سكنه على الماي
شگلها امن اروحن للمخيم
يخويه اشلون اصل واسمع اسكينه
تگلي الوعد يا عباس وينه
يخويه الموت ما بيني اوبينه
اودعنك واسلّم للمحتم
حنه ظهره اعلى اخيه مثل الهلال
يودعه والدمع بالعين همال
گام احسين لاچن گام بيحال
نحيل او بيه ماغير النفس تم
أيس من اخو وانگطع ظنه
او سدّر للخيم يجذب الونه
لفن زينب او سكنه ايسايلنه
وين الجابنه اوبينه اتوزم
يخويه ليش وحدك جاي لينه
چا عباس اخوك الفحل وينه
سمع زينب احسين اوجرت عينه
او بالعباس الها الاجر عظم
يگلها اوعلى خدوده الدمع يجري
راح البلشدايد چان ضخري
يزينب عگب اخوي انكسر ظهري
او سور المنع يا زينب تهدم
يزينب راح ابوفاضل عضيدي
اوطاحت رايتي اومرهفي امن ايدي
بگيت ابين عدواني اوحيدي
او عليه بن سعد للجيش حشم
اترك تعليق