دم سحّي الدمع علوجن يا عين
على البلسم دليله انجسم نصين
يوسفه سمته اعلى الغدر جعده
عمت عيني عليه وانفطر چبده
طول الليل ظل ايلوج وحده
اوصوّت فوگ راسه طاير البين
مدري اشلون حال احسين من طب
شاف الحسن بفراشه ايتگلب
انخطف لونه اوگعد عنده ايتنحب
يبو امحمد يخويه اليوجعك وين
شبح عينه يويلي اعلى ابو اليمّه
واوماله يخلي الطشت يمّه
اثاري الچبد يتمرّد ابسمّه
اووجهه اتلوّن امن المرض لونين
ونّ الحسن ونه التنشب الهم
اوهبط للطشت راسه اوجدف دم
صاح احسين اثاري الحسن منسم
شان الدهر يحرب على الطيبين
اشكثر الدهر فرّگ بين الاحباب
اوسهمه اعلى أبو محمد بالگلب صاب
گعد ينحب اولن الدگ على الباب
صاح الحسن شيل الطشت يحسين
گام اوشال ذاك الطشت عنّه
عمت عيني او يون اشلون ونّه
طبت زينب اتشوف المچنّه
لن دم الگلب بالطشت لُونين
يخويه جيت اريد انظر ولييّ
ولا عندي خبر مسموم اخيّي
يخوي احسين عني زال فيّي
آه اشلون غدره غدرة البين
حن احسين اويلي اوصفگ بيده
اوون ونات المفارج عضيده
يگله العمر من عگبك مريده
يخويه اليوم عدوانك امعيدين
ابو محمد ضعف حيله ابونينه
اوظل يرشح عرگ منه جبينه
تشهد ويل گلبي اوغمض عينه
اوبالسم خلص عزّ الهاشميين
اترك تعليق