استنهاض وتمني

استنهاض للإمام الغائب

يمتى يشع اعْلَه العوالم نور طيبه
ويمحي الظّلم والجور نور الله وحبيبه

عجّل يَسيف الله اُويا ركن الدّيانه
جار الدّهر واستولت علينا اعدانه
چم دوب تغضي الضّيم يَمْشكَّر علانا
عجّل يغوث الموزمه طالت الغيبه

طالت الغيبه والحشا منّا اشتعل نار
چنّك مَتدري اشصار يومٍ طبّوا الدّار
حرگوا وضربوا واسگطوا وانبتوا مسمار
ولطمة العين اعظم يبو صالح مصيبه

ماتت نحيله عگب ما كسروا ضلعها
وانغدر حگها ومن فدك لوّل منعها
نخّت وخطبت بيهم ومحّد سمعها
متمرمره وطلعت من الدّنيا كئيبه

ابكل الجرا تدري شعدّد من مصايب
من غصب حيدر للطفوف ام النّوايب
والشّيعي گلبه ابحزن متگطّع وذايب
يجذب الحسره ويهتف ومحّد يجيبه

تنسى يَبو صالح ابوك حسين من طاح
راسه انگطع واتلاگفوه ابزان وارماح
وهجموا على خيامه الأعادي وبن سعد صاح
هجموا على حريمه انذبح ليث الحريبه

وانهض ترا حرگوا خيمكم والظّعن شال
للشّام بالنّسوه وظل جدّك على رمال
رمِّل يبو صالح نساهم وانهب المال
واسبي الحرم زينب ترى راحت سليبه

زَلْزَل الكوفه وكربلا وانسِف الشّامات
وانشد عن الوگفت ابدروازة السّاعات
وگل للفرات حسين يمّك بالعطش مات
مايك لخلّيه ابد ما يجري صبيبه

وانشد هل الشّامات علّلي شهّروها
وابْوَسط مجلس باليتَامى وگفوها
يعرفون جدها او ياهي امها او من أبوها
وياهُم اخوتها او من إهِي او توگف غريبه

تعداد المصائب للإمام الغائب

يا حجّة الله غيبتك صارت بطيّه
عجّل علانا الجور يا شمس المضيّه

يمتى على العالم يشع من غرّتك نور
بيه العدل تنشر وتطوي الظّلم والجور
امْن السّامري والعجل من جزله المسعور
الصّخره الأساسيّه الدهت كل البريّه

يا طالب الثّارات دنهض چم إلك ثار
من يوم حيدر والحبل والضّلع والنّار
والضّربة اللّي عمّمت هامة الكرّار
ومن دم راسه اختضبت الشّيبه البهيّه

ويلاه يا هضم الحسن ومصاب سمّه
بن هند غاله وفاتت الاعدا ابدمّه
يَمْ گبر جدّه اسْهامهم نشبت ابجسمه
امصيبه ويهوّنها مصاب الغاضريّه

أعجز شعدّد من مصايب يوم لطفوف
چم طفل بيها وچم شباب انذبح ملهوف
ياما انگطعت روس بيها وطارت اچفوف
وياما اجسادٍ رضّضتها الاعوجيّه

منعوا على حسين الورد وانذبح عطشان
وظلّت الخيل اتجول فوگ اعضاه ميدان
والهضم يبن العسكري ضيعة النّسوان
واطفالها الرضعت من اسهام المنيّه

وجدّك علي السجّاد بعد اليسر والذّل
يگضي العمر ليله ونهاره دمعه ايهل
مَيشوف غير ايتام تتضوّر ا وتعول
وينظر منازل كل هله منهم خليّه

ويگضي ابسمّه او بعده الباقر تباريه
بالضّيم وانواع البلايا عيون اعاديه
عرفت بنو مروان اصلها او جارت اعْليه
وذاك السّرج سبّب له اسباب المنيّه

تعداد باقي مصائب الأئمة

يا صاحب الغيبه شعدّد من رزيّه
من هالمصايب والشّرح يصعب عليّه

أذكر الصّادق والذي قاسى من اهموم
من طاغية مروان وامْن اولاد لعموم
ومن عگب ما وضّح المذهب مات مسموم
واذكر جسر بغداد والحاله الشّجيّه

من هالذي جابوه وابْرجليه لگيود
مرمي ثلثتيّام فوگ الجسر ممدود
حتّى النّصارى استنكرت منّه وليهود
اينادون هالميّت إمام الرّافضيّه

يا صاحب الغيبه دريت ويا الرّضا اشْصار
المامون مثله ما جرى بالزّمن غدّار
عاهد وخان العهد واردى شبل لَطهار
غيله ابسمّه ولا رعى ربّه ونبيّه

وامّا الجواد ايصدّع الجلمد مصابه
فوگ السّطح مطروح نائي عن احبابه
عجّل عليه الطّاغي ابْغاية شبابه
بدْيار غربه جرّعه احتوف المنيّه

واجلوا الهادي امْن المدينه واوحش الدّار
سافر ولا من هالسّلاله ترك ديّار
ظلّت منازلهم عليها سافي اغبار
بيها نعيب البوم كل صبح ومسيّه

ودّوه سامرا وبيها صار محصور
منعوا ولا واحد يجي ايسلّم ولا يزور
والشّمس ما يگدر أحد يخفي لها نور
سمّه الطّاغي وغابت الشّمس المضيّه

وعاينت ابوك العسكري اشْكابد من اهموم
من جور عدوانه وتالي مات مسموم
واللي يواليكم من الاجيال مهضوم
مكسور گلبه وينتظر منّك الجيّه